يا ابن التيييت

كلنا بنمشى فى الشارع و كلنا بنسمع الفاظ كتير خارجه بس انا اكتر حاجه بجد بتستفزنى لما واحد يشتم صاحبة الى ماشى معاه و يقوله يا ابن التيت او يمكن حتى يسبله التيت بس المهم انا بتغاظ جدا يمكن علشان هو صاحبة المفروض انه يحترمة بس المشكله انى بلقية عادى و يضحك لما يتشتم و كأنه قاله نكته بدل ما يتغاظ و يديله جوز اقلام على قفاه كأنه عادى انه يشتمة و يسبله التيت كمان
مش هتكلم كتير فى الموضوع ده لانى بردوا احيانا بكون متغاظ من حد و بسبله التيت بس فى سرى و خاصة لما يكون حد مهم بس الصراحه انا برتاح لما بعمل كده ياترى كلنا كده و لا انا لوحدى الى بسب التيييييييييييييييت
و عجبى ....,

فوق مستوى الشبهات

هو يعنى ايه انسان فوق مستوى الشبهات انا بصراحه مش فاهم الكلمة دى
بعنى مثلا يجى واحد مهم نبقى كلنا عارفين انه اكيد حرامى و بيقلب عيشه و نقول فوق مستوى الشبهات
او واحد مثلا فى منصب مهم و بيستخدم صلاحيات وظيفته غلط و نقول فوق مستوى الشبهات
او واحد شيخ و نبقى عارفين انه بيقوم باعمال الدجل و السحر و نقول فوق مستولى الشبهات بس لما سألت نفسى السؤال ده معرفتش ايه ممستوى الشبهات الى الناس دى فوقه
بس الى انا اعرفه على حد علمى انه مستوى الشبهات ده مش واطى للدرجه دى علشان الناس دى كلها تبقى فوقه
انا جالى السؤال ده انهاردة و انا راكب مكروباص و ماشى فى الشارع و لقيت الظابط بياخد رشوة من السواق علشان يعدية و لما سألت نفسى هو كده مرتشى لقتنى برد على نفسى و اقول لا ده رتبه كبيرة ده فوق مستوى الشبهات
و عجبى ....,

شبة الحقيقة

فى الحقيقة انا لقيت الحقيقة مش زى ما انا عاوز بس لقيت حاجه اجمل من الحقيقة اسمها شبة الحقيقة و الى هى دى الحاجه الى احنا بنستخدمها فى افكارنا او حياتنا الشخصية جدا و انا اعتقد ان شبة الحقيقة دى الافكار او الرغبات الى جوانا و مش بنقدر نعملها لدافع دينى او انسانى او حتى يمكن شكلنا قدام المجتمع و منها ان الواحد يحب واحدة تانية غير مراته او ان الواحد يتمنى يكون مرتبة عشرين الف جنية او انه يركب عربية مرسيدس او او او اوات كتير بس كلها اشباه الحقيقة من وجهة نظرى لانى انا مثلا نفسى اتجوز نانسى عجرم و اسكن فى مارينا او اركب عربية BMW و يكون مرتبى فى الشهر .... مرتب ايه انا عندى اكبر شركة بتعمل كل حاجه فى الدنيا بتجبلى ملايين كل شهر بس الاكيد انى فى الاخر عندى حاجه مهمة جدا الستر و راحه البال و مفتقد حاجه اهم من دول كلهم بابا الله يرحمة هى دى الحقيقة و شبة الحقيقة
و عجبى ؟؟؟؟؟؟؟

البداية

من الان فكرتى عنوان حياتى و من واحد صحبى جائت الفكرة
ليه متكونش افكارى قدام الناس هو انا هتكسف اتكلم عن نفسى و لا يترى هخاف ان حياتى تتكشف قدام الناس بس بجد الفكرة كلها جائت من طارق لما قريت المدونه بتاعته قلت ليه انا كمان معملش زية بس اكتب افكارى انا و حياتى انا بطريقتى انا يمكن حد يشوف ايه الغلط الى عندى فيقدملى النصيحه و يمكن يشوف حاجه صح يستفيد منها
فقررت اكتب
و مش هبطل كتابة